පන්ති නායකයා සහ අපේ ආතල්


පන්ති නායකයා වනාහි අමුතුම ජාතියේ එකෙකි… උගේ අම්මා හිතාගෙන ඉන්නේ ඉස්කෝලේ පරිපාලනයම උගේ අනුදැනුම ඇතුව සිදු වෙන දෙයක් කියාය.. ඌ හිතාගෙන ඉන්නේ පංතියේ නාම ලේකනය මුලු ලෝකයම බවත් උදේ හවස ඒක අරං එන යන ඌ ලෝකය උස්සං ඉන්න ඇට්ලස් යෝදයා කියාය.. ඌ යෝදයා කෙසේ වෙතත් ඇට්ලස් එකෙක් කියා අපටද සිතුන වාර අනන්තය.. පිරිමි විදුහලක පන්තියේ නායකයා යනු අර ග්‍රීක කතා වල බාගයක් අස්සයා සහ ඉතුරු බාගය මිනිහා වගේ හැදුන රූපයට සමාන එකෙකි…. උගේ සිරුර පිරිමි උනාට මනස අමු චීත්ත එකක් නෙවේ නම් ඌට කිසි සේත්ම පංති නායක පට්ටමක් නොලැබේ.. ඌ හිතං ඉන්නේ කොස්ස උගේ ජාතික වස්තුවක් කියාය.. අපි පංතියේ මදාවි ටීම් එක මනා පිලිවෙලකට පවත්වාගෙන යන අතර ඌ කුඩා කල පටන් සිය පංති නායක දුරයට අවශ්ය සුදුසු කම් සපුරාගනී ඒවයින් කොටසක් පහත දැක්වේ.

1……
පන්ති බාර සර්ගේ මයිල් ගහක් හෝ උදේ ගේට්ටුවෙන් එනවා දුටු විට මල් වත්තේ ශූටිං එකේදි දිල්හානි බදාගන්නට දුවගෙන එන ජීවන් කුමාරතුංග වගේ දුවගෙන ගොස් සර්ගේ අඩුම කුඩුම පිරුන මල්ල ඉල්ලාගෙන එය සදාතුක කරඬුවක් මෙන් ඔපිස් එකට වැඩමවීම

2.. පාරකදි තොටකදී සර් යනවා දැක්කොත් පැනගෙන ගොස් ගොම ගොඩක් උඩ හරි කමක් නෑ දනගසා වැඳ සර් ව විලි ලැජ්ජාවට පත් කිරීම..

3… විබාගෙට ලකුනු දුන්නම ඒ ලකුනු පිරික්සා තව ලකුනක් හෝ දමාගන්නට සර්ගේ අස්සේ කරකැවීම…

මෙකී නොකී ආටක නාටක වේපට සුංගං නැටීමෙන් පසු ඌ පන්ති නායකයා වන අතර අප අයත් වන්නේ කාලකන්නි වල් බල්ලන්ගේ ගොඩටය… පන්ති නායකයාගේ දින චරියාව අමුතු එකකි.. උගේ පැත්තට සූරියා පායන්නේ අපේ පැත්තට පායනවාට වඩා පැය තුනකට කලිනි.. ඉස්කෝලේ මුරකාරයටත් කලින් ඉස්කෝලෙට එන පොර පලමුව කොස්ස සෙවීමේ මහත් වූ වෙහෙස ගෙන දෙන්නාවූ කාර්යය ඉටු කරයි.. නිදන් හොරුන්ගෙන් කොතේ චූඩා මානික්යය බේරගත්තත් වෙන පංති වල එකාලාගෙන් කොස්ස බේරා ගත නොහැක.. නොමල ගේකින් අබ මිටක් සොයා උකටලීවැ ගිය කිසා ගෝතමිය මෙන් පංති පීරා කොස්ස සොයාගත නොහී නයා මැරුන කූතාඬියකු සේ ආපසු පංතියට එන නායකයාට ඇති ලොකුම ගැටලුව පංතිය අතුගාන්නට බැරි වීම වුවත් එදාට අපට පංතිය අතුගාන්නට තිබුනොත් එහෙම අපි දෙන පිනෙන්ම කොස්ස හොරකම් කරපු එකා නිවන් දකිනු ඇත.. කෙසේ හෝ පංති බාර සර්ට කේලම කියා අලුත් කොස්සක් ගැනීමට මුදල් එකතු කරගන්නා නායකයා එයින් මිලදී ගත් කොස්ස මැනිකක් රකිනා නාරජිඳෙකු සේ රැකීමට තරයේ සිතාගනී.. අපට සිටි සමහර පංති නායකයන් වෙස්සන්තර රජු සොයා වංක ගිරියට ගිය ජූජකයා සිහිගන්වමින් කොස්ස බිම ඇන ඇන ගෙදර ගෙන ගොස් පසුවදා ගෙන එන අවස්තා ද ඇත..

මේ මොන මගුලකට සමාව දුන්නත් අපි අපේ පංති නායකයාට සමාව නොදෙන වරදක් ඇත.. එනම් සර්ලා ටීචර්ලා කැන්දාගෙන එන්නට දුවන දිවිල්ලය….. පීරියඩ් එකක් පටන් ගන්නට බෙල් එක ගහලා විනාඩි 5ක් පමණ යන විට එම විශයට අදාල සර් හෝ මිස් නොපැමිනියොත් නායකයාගේ පස්ස පැත්තේ ඉත්තෑවෙකු රඟදැක්වීමට පටන්ගනී.. සර්ට අමතක වෙලා හෝ මොන මගුලක් වෙලා හෝ එන්න පරක්කු වීම අපට දෙවියන් විසින් දුන් පඬුරක් වැනිය.. පංති නායක මූසලයාට ඒ ආතල් එක නොතේරේ.. අපේ රැවුම් ගෙරවුම් මද්යයේ නායකයා සර් ව මැඩම්ව සොයා යන ගමන අරඹයි…. විනාඩි 5ක් පමන යන විට අපේ අහින්සක චිත්ත සන්තානයන් දැදුරු කරමින් කවකටු පෙට්ටි ඩ්‍රම් සෙට් වාදනයට තිත තබමින්.. බලමින් සිටි කුනුහරප පත්තර හකුලවමින්.. පෑන් ගසන එවුන්ගේ ක්‍රීඩා පිට් දෙවනත් කරමින්… සවස පංති අතර සිදුවන මහා ලෝක යුද්දයට අවශ්ය රබර් පටි ගිනි අවි සඳහා ස්වීප් ටිකට් වලින් උණ්ඩ නිපදවන උන්ගේ නීති විරෝධී උණ්ඩ නිශ්පාදනාගාර වසා දමමින් සර් කැඳවාගෙන එන අපේ පන්ති නායකයා පංතියට එන්නේ ලොකේ ලොකුම වැඩේ කෙරුවේ ඌ වගේය…

ඉන් අනතුරුව පංති නායකයා අපට හතුරු කම් කිරීම ඇරඹේ.. දවසට පංති අටකට පමණ උගන්නන සර්ට අපේ පංතියට ගෙදර වැඩ දුන්නාදැයි මතක නැත.. සර්ට වඩා දහ ගුනයක් පමණ වැඩ තියෙන අපට සර් ගෙදර වැඩ දුන්න බව කොහෙත්ම මතක නැත.. එහෙත් පංති නායක උලමාට පස්ස පැත්තේ අමාරුව සැරටම සෑදී ඇති නියාව මොනවට ගම්ය කරමින් සර් ආයිබොවං කියා අවසන් වූ වහාම අපේ ලේ කෝප කරමින්

“සර් ඊයේ කරන්න දුන්න වැඩ ”

කියාගෙන විසිතුරු වර්ණ රටා වලින් මල් සරසා පිට කවර දමා ඇති උගේ පොතත් උස්සාගෙන සර්ගේ අස්සට පැනීම අපට සෙනසුරු අපලය ලඟා කර දීමක් වැනිය.. උගේ පොත හරහා තඩි හරි ලකුණු පුරවා පොත ඌ අතට දී ගෙදර වැඩ නොකල අපේ පිට හරහා ගුටි සලකුණු තබන සර් ඉන්පසු ඉගැන්වීම පටන් ගනී.. සර් උගන්වන අතරේද පංති නායකයා සිය ලකුණු රැස් කිරීමේ මෙහෙවර අත් නොහරී.. සර්ගේ අවදානය ගැනීමට විවිද ඇක්ශන් දැමීමට ඔහු උපන් හපනෙකි.. තමන් අවදානයෙන් සිටින බව සර්ට ඇඟවීමට ඌ සර්ගෙන් විවිද ප්‍රශ්න නගයි.. අපිත් සර් උගන්නන අතරේ සර්ගෙන් විවිද ප්‍රශන අසන අතර අප ඒවා අසන්නේ සර්ට නො ඇසෙන්නට සිහින් හඬින්ය…
“ලමායි අපේ මේ කනේ ඇතුලේ පටලයක් පිහිටලා තියෙනව”
යැයි සර් උගන්නන විට අපි රහසේ නගන ප්‍රශ්න වන්නේ
” පටලේ ලොකුද දන්නෙ නෑ නෙහ්”
“කන්යා පටලෙද දන්නෑ නෙහ්”
“හිටගෙනද දන්නෑ නෙහ්”

ආදී ලෙස වුවද පංති නායකයා එවැනි බුද්දිමත් ප්‍රශ්න නො අසයි.. ඌට ඕනේ ඌ ගෙදරදී අච්චු පොතෙන් අද කරන පාඩම ඊයේ කියවූ බව සර්ට අඟවන්නටය..

” සර් ඒක කර්ණ පටහ පටලය”
කියා සිය බුද්දි ප්‍රභාව විහිදා සර් ව පොට්ට කර දැමීම ඌ විසින් සිදු කරයි.. සර් ටත් ඊට එහා දෙයක් නැත. ඇස් කන්නාඩියේ පැත්තේ අන්ඩ මාපටෙඟිල්ලෙන් සහ දබරැඟිල්ලෙන් අල්ලා යන්තම් ඉහලට ඔසවා නායකයා දෙස බලන සර් ” අන්න හරි හොඳ ලමයා” කියා නායකයා ට ප්‍රසංසා කරයි..බැරි වෙලාවත් සර්ට මොකක් හරි මගුලකට මල පැන සිටි වෙලාවක පංති නායකයාගේ මෙම පැන පැන දීම ට කෝප වන සර්
“තමුසේ ඉන්නවකො පනින්නේ නැතුව ”
කියලා කීවොත් පිටිපස්සේ අපේ මදාවි සෙට් එකට සිංහල අවුරුදු ලබන්නේ ඒ වෙලාවටය.. ලද අවස්තාවෙන් උපරිම පල ලබාගෙන විවිද අංග චලන මගින් පංති නායකයාට උසුලු විසුලු පාන අපේ සංදර්ශනය නතර වන්නේ
” සර් මෙයාලා ඇද කරනවා”
කියා පංති නායකයා විසින් කරනු ලබන පැමිනිල්ල මත ” මෙහේ වරෙවු යන දයාබර ආමන්ත්‍රනයෙන් පංතිය ඉදිරියට එන අපේ කොඳු වල ඇද සර්ගේ සුරතින් ඇරීමෙන් අනතුරුවය.. .මනමේ කුමරා මියගිය පසුව වැද්දා විසින්ද එලවා දමා අසරන වූ මනමේ කුමරිය මෙන් සර්ගෙන් ගුටි කා ඩෙස්ක් පේලි මැදින් ආපහු යන අපට පංති නායකයාගේ සරදම් සිනාව වේදනාවෙන් වුවද දරාගැනීමට සිදු වේ.. හදිසියේ වත් සර්ට පාඩම අතරමැදින් ඔපිස් එකට ගිහින් එන්නට සිදු උනොත් යන්නේ පන්ති නායකයාට අප මෙල්ල කර තබාගන්නා ලෙසත් කෑගහන එවුන්ගේ නම් කලු ලෑල්ලේ ලියා තබන ලෙසත් පවසමින්ය.. උගේ ජවනිකාව ඇරඹෙන්නේ එතැන් සිටය.. ඌ පන්තිය ඉදිරියට ගොස් හිටගන්නා අතර අපට උගෙන් වැඩක් නැත…. හැකිලී ගිය කුනුහරප පත්තර පිටු නැවත දිගහැරේ… විවේකීව සිටි කවකටු පෙට්ටි වාදකයෝ සිය වාදනය අරඹති… පෑන් ක්‍රීඩකයෝ සිය කවුශල්යය විදහා පාති… කොල කන දලඹුවන් පිරිස පොතේ පිටිපස්සේ පිටුව කඩා කටේ දමා විකමින් කයිවාරුව අරඹති…පංති නායකයා කලු ලෑල්ලේ කෑගහන අපේ නම් ලියයි… සර් ඈත එනවා දකින විට ලෑල්ල දෙස බලන අපේ බොක්ක රත්වී යන්නේ අපේ නම් ද කලු ලෑල්ලේ ලියා තියෙනු දකින විටය.
.” ඒ ඕයි ඕක මකනවකො අන්න සර් එනවා..”
කියමින් මරණයට කැපවූ ගවයන් මෙන් අප කොතෙක් ආයාචනා කලද මුනින් හැරවූ කලයකට කොතෙක් දිය වත් කලද නොපිරෙන්නාක්මෙන් පංති නායකයා මකන්නේ නැත…පංතියට එන සර් අපට ගුටි දෙන අතර අප විසින් පංති නායකයාගේ දයාබර මෑනියන් ගවුරව පූර්වකව සිහිපත් කිරීම සිදු වේ…
සර් අපට පිටුපා කලු ලෑල්ලේ ලියන අවස්තාවද අපට ආතල් ගැනීමට මහඟු තෝතැන්නකි… සර්ට ඇද කිරීම උසුලු විසුලු පෑම ඉන් කීපයකි… චූන් එක වැඩි වූ එකෙක් තව එකෙකුට කොල ගුලියකින් ගැසීම ආදිය අමතර ක්‍රියාකාරකම් වන අතර කොල ගුලිය ඌට නොවැදී ඉස්සරහට ගොස් සර්ගේ වැදුන අවස්තාද නැතුව නොවේ…. එබඳු අවාසනාවන්ත නිමේශයන් වලදී ලෑල්ලේ ලිවීම නවත්තන සර් පන්තිය දෙසට හැරී
” මොකාද මේක ගහපු එකා” කියා ඇසුවද වරද පිලිගෙන විහින් කෙලවාගන්නට තරම් උදාර සිංහ පැටවු තුන් හෙලේ කැලෑ තුල සිටියද අපේ පංතියේ නැති බැවින් පංතියේ සියල්ලන්ටම එලියට ගොස් හිටගෙන සිටීමට සිදු වේ… ඒක අපට පට්ට ආතල් එකකි….එහෙත් පංති නායකයාගේ තත්වය සෝකාකූලය… උගේ වැලපිල්ල අහං ඉන්නට අමාරුය… කැලේ පලවැල නෙලන්නට ගොස් සිටින අතරේදී සිය දරුවන් දෙදෙනා ජූජක බමුනාට දී ඇති බව දැනගන්නා මංත්‍රී දේව්ය වැලපෙන්නේ යම්සේද ….බ්‍රහ්ම දත්ත රජු විසින් සඳකිඳුරා මරාදැමීමෙන් පසු කිඳුරිය වැලපෙන්නේ යම් සේද… පංති නායකයාගේ වැලපිල්ල ඊට හත් කූරුවක් අන්තය… කොල ගුලිය ගහපු එකා ලඟට එන පංති නායකයා වරද පිලිගන්නට ඌට බල කරයි…වාර විබාගයෙන් පන්තියේ දෙවැනියා තුන් වැනියා වෙන පොත් කාවන් දෙදෙනාද පංති නායකයාගේ සහයට පැම්ණ
” ඒ අපරාදේ බං පීරියඩ් එක අපට ඉගෙනගන්න ඕනේ .. උඹ පිලිගනින්කෝ බං උඹ කලේ කියලා… ආදී වශයෙන් අපගේ කොල ගුලි අපරාද කරුට ඔවුන් බලකරයි…
එහෙත් සර් ගේ ගුටි පූජාවට ඇති බිය නිසා අපරාද කරු එයට අකමැති වන අතර පංති නායකයා සිය කලිසම උනා මල් චීත්තයක් ඉන වටා නෙරිය තියා ඇඳගෙන සර් හමු වී සර් අර අරයා තමයි ගැහුවේ කොල ගුලිය කියා කේලම කියා එහි ප්‍රතිපලයක් හැටියට අපේ අපරාද කරුට වේවැල් පහර කීපයක් ලබා දෙවා සිය අද්යාපන වරම ලබා ගනී.. මෙබඳු කේඩෑරි වැඩ කරමින් අපට දිගට හරහට කෙලවූ පංති නායකයකු මට ඊයේ පෙරේදා දවසක ෆුඩ් සිටි එකේදී හමු වී පැවසුවේ

” අඩෝ මචං… උඹලා අපි ඒ කාලේ කෙලපු පිස්සු., ගත්ත ෆන් අද පොඩි එවුන්ට නෑ බං”

කියාය… එදා ඉඳං මට හරියට කෑමක් නැත නින්දක් නැත.. හිතේ අහස පොලව ගැට ගහන්නට තරම් ප්‍රශ්නයකි……ඒ ප්‍රශ්නය නම්…

ඌ කෙලපු පිස්සු සහ ඌ ගත්ත ෆන් මොනවාද යන්නයි…

මෙය උපුටා ගන්නා ලද්දකි. සියලුම අයිතිය මුල් කතෲ දනුෂ්ක කාංචන සතුවේ.

2 thoughts on “පන්ති නායකයා සහ අපේ ආතල්

ප්‍රතිචාරයක් ලබාදෙන්න

Fill in your details below or click an icon to log in:

WordPress.com Logo

ඔබ අදහස් දක්වන්නේ ඔබේ WordPress.com ගිණුම හරහා ය. පිට වන්න /  වෙනස් කරන්න )

Google photo

ඔබ අදහස් දක්වන්නේ ඔබේ Google ගිණුම හරහා ය. පිට වන්න /  වෙනස් කරන්න )

Twitter picture

ඔබ අදහස් දක්වන්නේ ඔබේ Twitter ගිණුම හරහා ය. පිට වන්න /  වෙනස් කරන්න )

Facebook photo

ඔබ අදහස් දක්වන්නේ ඔබේ Facebook ගිණුම හරහා ය. පිට වන්න /  වෙනස් කරන්න )