මද්ද


දැක්කේ කැකිරී ගෙඩියයි යන එන පාරේ
ටක්කෙට මතක නෑ රසකර කෑ කාලේ
සැකයක් ඇති උනත් කට කෙල ඇත බේරේ
මද්දට හසුවුනයි මගෙ හොඩවැල දැන් හිරවේ

වනජීවී මහත්තුරු එනකන් දින හතරක්
මද්දට හිරවු හොඩවැල කම්බිම පොට හතරක්
කන්නට තිය බොන්නට බැරි හැටි විතරක්
මටනම් හිතුනේ මගෙ මැටි කම ගැන විතරක්

පොටවල් හතර කපලා හොඩ වැල ලිහුවා
කුණුවූ තුවාලේ මොන මොනවද ගෑවා
බේත් සැරට බඩ බොකු ඔක්කාරෙට ආවා
නෑ නෑ ඒ නිර්වින්දන සැරටයි කීවා

මිනිහා උනත් එක එක ජාතියේ ඇත්තේ
දුප්පත්කම නිසයි මද්දක් අටවනු ඇත්තේ
කට්ටක් උනත් වනවජීවිය මේ පැත්තේ
බෝසත් මිනිස්සුයි අප රක්කේ මේ පැත්තේ

හොඩයේ ලොකු හිලකි බොන්නට බෑ වතුර
ගස් අතු කඩන්නට හොඩයෙන් බෑ නිතර
අහුවෙන තණකොළයි දැන් කන්නෙම නිතර
මරණය අත ලගයි බව දැනෙනවා මිතුර

රෝහණ කේ අමරකෝන්

ලොව විශාලතම බැටරිය.


ඇමෙරිකාවේ Missouri ප්‍රාන්තයේ පිහිටා ඇති Taum Sauk Hydroelectric Power Station ජල විදුලි බලාගාරය ඉතාමත් අපූරු එකක්. මෙම බලාගාරයෙන් නිපදවන විදුලි බල ප්‍රමාණයට වඩා වැඩි විදුලි බල ප්‍රමාණයක් උපයෝගී කරගෙන නැවත මෙම ජලාශයටම එම ජලය පුරනවා. මේක බැලූ බැල්මටම පෙන්නේ මෝඩ විකාර කතාවක් වගේ.

මෙම බලාගාරයට ජලය සපයන ජලාශය ස්වභාවික එකක් නොවේ. මෙය කන්දක් උඩ කොන්ක්‍රීට් වලින් කෘතිමව නිපදවපු ටැංකියක් කිව්වොත් වඩා නිවැරිදියි. මෙයට ජලය සපයන එකම ස්වභාවික ජල මාර්ගයක්වත් පිහිටා නැහැ.

විදුලි බලාගාර වල නිපදවන විදුලිය ගබඩා කර තබා ගන්න බැහැ. සිදුවන්නේ ඉල්ලුමට අවශ්‍ය ප්‍රමාණයට සරිලන ලෙස විදුලිය එම මොහොතේම නිපදවා පද්ධතියට එක් කිරීමයි. නමුත් ඉල්ලුමට සරිලන ලෙස නොකඩවා විදුලිය සැපයීමට නම් සෑම විටම පද්ධතියේ ධාරිතාවය වැඩි කර යුතුයි.

Peak time යනු අධික විදුලිය පරිභෝජනයක් ඇති වේලාවයි (රාත්‍රී 6 – 9 සහ උදෑසන). මේ වේලාවට අවශ්‍ය විදුලි ඉල්ලුම සැපයීමට තාප බලාගාර ක්‍රියාත්මක කර විදුලිය නිපදවිය යුතුයි. මෙය ලාභ දායක නැහැ. ඒවගේම Off Peak time යනු එතරම් විදුලිය පරිභෝජනය නොකරන වේලාවක්. මේ වේලාවට අක්‍රිය කල නොහැකි සුර්ය, සුළං, ජල වැනි බලාගාර විදුලිය බොහොමයක් පරිභෝජනය නොවන නිසා අපතේ යනවා ඒවා ගබඩා කර ගත නොහැකි නිසා.

Peak time එකේදී ඉහත ටැංකියේ ජලය භාවිතා කර ඊට පහලින් ඇති බලාගාරයේ ජල විදුලි ටර්බයින කරකවා විදුලිය නිපදවා පද්ධතියට එක් කරනවා. ඉවත් වන ජලය බලාගාරය ආසන්නයේ වෙනත් ටැකියකට එකතු වෙනවා. මේ නිසා තාප බලාගාර භාවිතය අවම වෙනවා.

Off Peak time එකේදී පද්ධතියෙන් අපතේ යන (සුළං, සුර්යය බලාගාර) විදුලිය උපයෝගී කරගෙන මෝටර් ආධාරයෙන් පහල ටැංකියේ ඇති ජලය නැවත ඉහල ටැංකියට පුරවනවා.

මේ නිසා සැබවින්ම සිදුවන්නේ අපතේ යන විදුලිය භාවිතා කර මෙම විශාල ජල ටැංකිය පුරවා නැවත ඉල්ලුම වැඩි විට එම ජලයෙන්ම නැවත විදුලිය නිපදවීමයි. මේ නිසා තාප බලාගාර වලින් විදුලිය නිපදවන අධික වියදම ඉතිරි වෙනවා. එම නිසා මෙම බලාගාරයේ නිපදවන විදුලිය සැබෑ ජල විදුලි බලාගාරයකටත් වඩා වටිනවා.

ඇත්තටම බැලුවම මේ විශාල ජල ටැංකිය අපතේ යන විදුලිය ගබඩා කර තබා ගෙන අවශ්‍ය වේලාවට මුදා හරින යෝධ බැටරියක්!!

සිංහලපීඩියා

ගල්කිස්සෙ වෙරළට වැලි පුරවන්න මිලියන 890ක් වියදම් උනාට ඒකෙන් පාඩුවක් උනේ නැහැ


වගකීමෙන් කියන්න ඕන ගල්කිස්සෙ වෙරළට වැලි පුරවන්න මිලියන 890ක් වියදම් උනාට ඒකෙන් පාඩුවක් උනේ නැහැ කියන එක.

වරාය නගර ව්‍යාපෘතිය වගේ ඒවට අපි මුහුදෙන් වැලි ගොඩක් ලබාගත්තා, මෙසේ වැලි දිගින් දිගටම ලබා ගත්තම අපි එක්ක මුහුද තරහවෙනවා, එහෙම තරහ නොවෙන්න නම් අපි ආයෙම යම් වැලි ප්‍රමාණයක් මුහුදට පූජා කළයුතු වෙනවා.

ඒ අනුව තමා මිලියන 890ක් වියදම් කරල වැලි පූජා කලේ….ඒ පූජා කරපු නිසා තව අවුරුදු 10කට අපට සුනාමියක් එන්නෙ නෑ..මුහුදෙන් අනතුරක් වෙන්නෙ නෑ.
එහෙම සුනාමියක් ආවනම් වෙන පාඩුව මිලියන 890කට වඩා බොහෝම වැඩියි.

ඒ නිසා දුරදිග හිතලා මේ කරපු වැඩේ අපි අගයන්න ඕන.

කරුණු නොදන්නා හිස් මිනිස්සු මේ වැඩේ විවේචනය කලාට කරුණු දන්න අපට එසේ කරන්න බැහැ…ඉස්සර වගේ නෙමෙයි දැන් වැඩකට නැති වැඩ වෙන්නෙ නැහැ.
ඒවා අධීක්ෂණය කරන්න ගෝඨා,මහින්ද,චමල්,බැසිල් කියන සිව් දෙනා වගේම ඒ අයට මඟහැරුනොත් නාමල් ඉන්නවා. ඒ නිසා අප බිය වියයුතු නැහැ.

නැවතත් කියන්නෙ මෙතන මිලියන 890ක් පාඩු උනේ නෑ…බිලියන ගණනක් ලාබ උනා මිසක. 

ඒවා අධීක්ෂණය කරන්න ගෝඨා,මහින්ද,චමල්,බැසිල් කියන සිව් දෙනා වගේම ඒ අයට මඟහැරුනොත් නාමල් ඉන්නවා. ඒ නිසා අප බිය වියයුතු නැහැ.”
අනිවාර්යයෙන්ම 

තිරසාර සංවර්ධනද? විනාශකාරී සංවර්ධනද? පරිසරය සමග අපි කොතනද?


රටක සංවර්ධනය කියන එක අනිවාර්යයෙන්ම වෙන්න ඕනි. ඒ හරහා තමයි රටේ මිනිස්සුන්ට රැකියා අවස්ථා වැඩිවෙලා විරැකියාව තුරන් වෙලා අතේ මිටේ වැඩිපුර මුදල් ගැවසිලා මිනිස්සුන්ගේ ජීවන තත්වය උසස් මට්ටමකට ගේන්න හැකියාව ලැබෙන්නේ.

ඒක රජයකට තනියම කරන්න පුළුවන් දෙයක් නෙවෙයි. හැබැයි රජයට පුළුවන් ඒ සංවර්ධනය ලගා කරගන්න අවශ්‍ය යටිතල පහසුකම් සහ සේවාවන් හදලා රටේ රාජ්‍ය සජ පුද්ගලික අංශයේ ආයතන වලට ඉතිරි ටික කරගෙන යන්න ඉඩ හදලා දෙන්න පුළුවන්.

අන්න එතනදි රජය ක්‍රියාත්මක කරන සංවර්ධන වැඩ පිළිවෙලවල් පරිසර පද්ධති විනාශ නොකර පරිසරයට අවම හානියක් වෙන විදිහට තිරසාර සංවර්ධන වැඩපිළිවෙලවල් වලට යොමුවිය යුතුයි.

එහෙම නොවුනොත් වෙන්නේ සංවර්ධනය නිසා සිදුවන පරිසර හානිය තුලින් සංවර්ධනය තුලින් බලාපොරොත්තු වෙන ආර්ථික ලාභයට වඩා කිහිප ගුණයක ආර්ථික හානියක් අසමතුලිත පරිසරය නිසා ඇතිවන පලවිපාක වලින් ඇතිවෙන එක.

යම් සංවර්ධන ව්‍යාපෘතියක් කරද්දි පරිසරයට වෙන හානිය තක්සේරු කරන්න රජයේ එක එක ආයතන රාශියක් තියෙද්දිත් ලංකාවේ සිදුවන සමහර සංවර්ධන ව්‍යාපෘති ඒ කිසි දෙයක් කනකට නොගෙන දිගටම පරිසරය විනාශ කරමින් සිටිනු දැකීම ඉතා ඛේදනීය තත්වයක් බව නොකිව යුතුය.

එසේම ඔවුන් මේ විනාශ කරන්නේ අපේ පරිසරය නොව අපගේ අනාගත පරපුරේ පරිසරය බව අමතක නොකළ යුතුය.

ගෙවතු වගාවට ඔබේ ගෙවත්තේ ඉඩ හරියට ප්‍රයෝජනයට ගමුද?


ඔබේ ගෙවත්ත හරියට ප්‍රයෝජනයට ගනිමු.

ඔබට වසර පුරා ඵලදාවක් දෙන හා අවශ්‍ය වන එළවළු, පළතුරු, කුළුබඩු සහ බෙහෙත් පැළෑටි වගා කරමු.

එළවළු වගා කිරීමේදි අඩු ඉඩකඩකින් අඩු කාලයකින් දිගුකාලීන ඵලදාවක් ලබා දෙන පළාවර්ග, මිරිස්, සලාද වර්ග වගා කරමු.

ඒ වගේම ගස් වල සහයෙන් ගෙවත්තේ අහසේ ඉඩ ප්‍රයෝජනයට ගත හැකි මෑකරල්, වැටකොළු, කරවිල, නිවිති වැනි වැල් වර්ග වගා කරමු.

පළතුරු වගා කිරීමේදි පෝච්චි වල හෝ කුඩා ඉඩක වැවිය හැකි කෙටි කාලයකින් ඵලදාව ලබා දෙන දෙහි, ගස්ලබු, ඇබරැල්ලා වැනි පළතුරු වගා කරමු.

කුළුබඩු ලෙස ඉගුරු, කහ, මිරිස්, රම්පේ, කරපිංචා, සේර වැනි වසර පුරාම අපි භාවිතා කරන දේ වගා කරමු.

ගෙදර හදිසියකදී භාවිතා කළ හැකි බෙහෙත් වර්ග ලෙස කෝමාරිකා, කොහොඹ වැනි පැළ වගා කරමු.

ඔබේ ගෙවත්තේ තියෙන ඉඩෙන් උපරිම ප්‍රයෝජනයක් ගනිමු. දිගුකාලයක් වැයකොට කෙටි කාලයක් ඵලදාවක් දෙන ආහාර භෝග වෙනුවට කෙටි කාල පරතර වලින් දිගු කාලයක් ඵලදාව ලබාදෙන භෝග වලට මුල්තැන දෙමු.