ඔබත් ඉදිරියේදී Flemingo ලගෙ පිංතූර ගන්න යන්න බලාපොරොත්තු වෙනවාද? එහෙනම් මේක අනිවාර්‍යයෙන් කියවන්න.
දැනට ලංකාවෙ flemingo ල බලන්න පුලුවන් තැන් කිහිපයෙන් පහසුවෙන් සහ හොඳට බලන්න පුලුවන් තැන ගැනයි මේ කියන්නෙ.එතන නම කිවුවෙ නැතුවට ගොඩක් අය මේ වෙද්දි එතැන ගැන දන්නව.
පසුගිය දවසක දී අපි Flemingo ලා බලන්න ගිය ගමනකදි ලබපු අත්දැකීමක් මේ..
අපි එතනට යද්දි පාන්දර 4.30 යි.ඒ වෙද්දිත් එතනට flemingo ල පොඩි flock එකක් ඇවිත්.සමහරවිට උන් ටික රෑ එතනම හිටිය වෙන්නත් පුලුවන්.එ වෙලාවෙ තවම කලුවර හින්ඳ උන්ට නොපෙනී අපිට උන් ඉන්න තැනට කිට්ටුවෙන්න පුලුවන්වෙයි කියල හිතල ටිකක් කිට්ටුවට යන්න හැදුවත් අපිට තේරුනා උන් අපිව දැක්ක කියල.ඒක හින්ඳ අපි එතනම නැවතිලා ටිකක් එලිය වැටෙනකල් බලන් හිටිය පිංතූර ටිකක් ගන්න.එලිය වැටීගෙන එද්දි තව පොඩි පොඩි flemingo flock දෙක තුනකුත් එතනටම ආව. උදේ 6.15 – 6.20 විතර වෙද්දි Army එකට අයත් කලු පාට KDH වෑන් එකක ආපු දෙන්නෙක් වාහනෙන් බැහැල කෙලින්ම අපි හිටපු කිට්ටුවටම ඇවිදගෙන ආව.එක්කෙනෙක් ඇඳගෙන ආවෙත් රතුපාට ජැකට් එකක්.Flemingo ල ටික ඉගිලිලා ගියා.ඊටපස්සෙ ඒ ආපු දෙන්නත් ගියා.
ආයෙ පැය 1/2 කින් විතර තව Flemingo flock එකක් ඇවිත් අපිට ටිකක් දුරින් වැහුව.දුර වැඩිවුනත් අපි ඉස්සරහට ගියොත් උන් ටික ආයෙ ඉගිලිලා යාවි කියල හිතල අපි හිටපු තැනම ඉඳල පිංතූර ගන්න ගත්ත.ඊට ටිකකට පස්සෙ සුදු සහ කලු කාර් දෙකකින් ආපු කට්ටියක් කිසිම ආවරණයක් නැතුව කලපුවෙ බැහැල ඇවිදගෙන කෙලින්ම flemingo ලා ගාවට ගියා.එතනිනුත් දෙන්නෙක් ඇඳගෙන ඇවිත් තිබුනෙ තනි සුදු ඇඳුම්.ඒ Flemingo ටිකත් ඉගිලිලා ගියා.
ඊටපස්සෙ අපි එදා හවසයි පහුවදා උදේ 10.00 වෙනකලුත් එතනට වෙලා හිටියට එක flemingo කෙනෙක්වත් ආවෙ නෑ.නිදිමරාගෙන කිලෝමීටර් සියගානක් ගිහින් කට්ට කාලා හොඳ පිංතූර ටිකක් ගන්න තිබ්බ අවස්ථාව ආත්මාර්ථකාමී සහ තමන් පිංතූර ගන්න සත්තුන්ගෙ හැසිරීම පිළිබඳව කිසිම අවබෝධයක් නැති කිහිප දෙනෙක් හින්ඳ අපිට නැතිවුනා.ඒ වගේම එදා සහ පසුවදා විශාල දුරක් ගෙවාගෙන flemingo බැලීමටම පැමිණි කණ්ඩායම් දහයකට පමණම flemingo ලා නොදැක ආපසු යාමට සිදුවුනා.ඒ ක්‍රියාව සිදුකල අයගෙ පොටෝ මේකේ දාන්න පුලුවන්කම තිබුනත් එහෙම නොකර මේ විස්තර ටික විතරක් දැම්මෙ මේක දැකලවත් එයාලටම එයාල කරපු වරද තේරුම් ගනී කියල..
ඔබත් Flemingo ලා පිංතූර ගැනීමට යාමට අදහස් කරන්නේ නම් මේ කරුණු ටික සිතට ගන්න.
- Flemingo ලා බැලීමට යාමට ප්‍රථම උන්ගේ හැසිරීම් ගැන මූලික අවබෝධයක් ලබාගන්න – Flemingo ලා ඉතාමත් සංවේදී පක්ෂී විශේෂයක්.මිනිසුන් ඔවුන්ට ආසන්න වෙනවට ඔවුන් ටිකක් අකමැතියි.සාමාන්‍යයෙන් flemingo ලා උන්ගේ ඔලු වතුර තුල ඔබාගෙන කැම සොයමින් සහ හිස් ඉහලට ඔසව එකිනෙකා හා දබර කරගනිමින් හැසිරෙන අතර අනතුරක ඉව වැටුන විට රන්චුවම එකම දිශාවක් දෙස බලාසිටින අතර රංචුවම එක දිශාවකට ගමන් කරනවා.අනතුර පහව නොගියොත් රංචුවම එකවරම ඉගිලී ඈතට යනවා.මේ රංචුවේ ඇවිදීමට අපහසු ආබාධිත පක්ශීන් දෙන්නෙකුත් සිටිනව.උන්ට නිතරම ඉගිලෙන ගොඩබාන එක ගොඩක් අමාරුයි.ඒ ගැනත් ටිකක් හිතන්න.
- සති අන්ත මගහරින්න – දැනට Flemingo ලා දැකිය හැක්කේ කුඩා ප්‍රදේශයක පමණක් නිසා සති අන්තයේදී බොහෝ දෙනෙක් එහි පැමිණෙනවා.කට්ටිය වැඩිවෙනවිට Flemingo ලාට සිදුවන බාධාකීරීම් වැඩිනිසා උන් ඉගිලිලා යනව.දෙතුන් පාරක් එහෙම බාධා වුනහම දවසක් දෙකක් යනකල් ආයෙ උන් එතනට එන්නෙ නෑ.
- උදේ 5.30 ට කලින්වත් එතනට යන්න – flemingo ල ගොඩක් වෙලාවට උදේ 6.00 වගේ වෙද්දි එතනට එනව.ඒ එද්දි උන් ඈතතියාම අපේ movement දැක්කොත් උන් එතන land කරන්නෙ නෑ.
- ඔබට කලින් එහි ගොස් සිටින අයට ගෞරව කරන්න – ඔබට කල් වේලා ඇතුව එතනට යන්න බැරිඋනානම් ඔබට උන් අසලට ගිහින් උන්ව එලවන්න කිසිම සාධාරන අයිතියක් නැත.මොකද ඔබට කලින් පැමිණි අය එම සථානයේ සිටින නිසා.
- වටපිටාව අපවිත්‍ර කරන්න එපා – Flemingo ල ගොඩබසින ඒ ස්ථානයට අපි මුලින්ම යද්දි එතන ස්වභාවික ගල් මුල් හැරෙන්නට කෘතීම අපද්‍රව්‍ය මොකුත්ම තිබුනෙ නැති තැනක්.ඒත් පස්සෙ එතනට යද්දි එතනත් වනසල flemingo බලන්න ආපු අයම.මඩේ ඇවිදල මඩ පිහපු ටිෂූ ටික එතනම විසිකරල,තව ප්ලාස්ටික් බෝතල්,ශොපින් උර,මාස්ක් තැන තැන.
- ගමේ අයගෙන් උදව් ලබාගන්න – Flemingo ල කලපුවේ ඈත සිටින වෙලාවට එම ගමේ සිටින තරුණයන් කීප දෙනෙක් ඔරු හෝ බෝට්ටු මගින් ඔවුන් කිට්ටුවට ගමන් කිරීමට සේවාවක් සපයනවා.එම සේවාව ලබාගන්නේ නම් ඔවුන්ට සාධාරන මුදලක් ලබාදීමට කාරුණික වෙන්න.
තවත් සඳහන් කලයුතු කරුණු රාශියක් තිබෙන බැවින් සවිස්තරාත්මක ලිපියක් සැකසීමට ඉදිරියේදී බලාපොරොත්තු වෙනවා.
පැතුම් බංඩාර
අසම්මතය 